ГОРОД НОВИ САД

ЗАЩИТНЇК ГРАЖДАНОХ ГОРОДУ НОВОГО САДУ


ПРОЄКТ:

„УПОЗНАЙЦЕ ЗАЩИТНЇКА ГРАЖДАНОХ“

НОВИ САД

октобер, 2011. року

ПРОЄКТ
„УПОЗНАЙЦЕ ЗАЩИТНЇКА ГРАЖДАНОХ“
УВОД

Скупштина Городу Нового Саду 10. децембра 2008. року на своєй VII схадзки, на основи члена 126. Закона о локалней самоуправи ("Службени глашнїк РС", число 9/2002) и члена 24. точка 45. Статута Городу Нового Саду – пречисцени текст ("Службени новини Городу Нового Саду", число 43/2008), принєсла Одлуку о Защитнїкови гражданох. Одлука о Зaщитнїкови гражданох обявена у "Службених новинох Городу Нового Саду", число 47/2008 од 17. децембра 2008. року.

Канцелария Защитнїка гражданох почала робиц 11. октобра 2010. року, на адреси у улїци Войводянских бриґадох число 17 у Новим Садзе.
У свoєй потерашнєй роботи Защитнїк гражданох ше стретнул з барз вельким числом рижних притужбох, хтори му гражданє подношели. Притужби ше одношели на скоро шицки обласци дружтвеного живота и уходзели до шицких сферох роботи и поступаня орґанох Городу Нового Саду, алє и ширше. Тото цо у роботи на наведзених притужбох установене то же гражданє нє упознати у достаточней мири зоз своїма правами и обовязками хтори маю як странки у даяким поступку, алє тиж так су нє упознати анї з институциями хтори им можу помогнуц у витворйованю и защити їх правох.
Тиж так установене же гражданє у барз вельким проценту вообще нє упознати з институцию Защитнїка гражданох. Гражданє нє знаю цо тота институция представя, яки єй задатки, з чим ше вона занїма и нач вообще служи. Тиж так, нє упознати су же ше на ню можу поволац пре защиту їх правох, алє су тиж так нє упутени же им Защитнїк гражданох нє може ришиц проблем коло хторого вони уж водза судски або даяки иншаки спор.
Тото цо барз важне наглашиц и цо нє за похвалу, то же єст барз вельо нєпознатого у поглядзе самей институциї Защитнїка гражданох и при городских управох, явних подприємствох, службох и других орґанох и орґанизацийох чий снователь Город Нови Сад. Заняти у наведзених подприємствох и управох нє упознати з компетенциями, задатками и поступаньом Защитнїка гражданох, цо представя барз вельки проблем за гражданох о чиїх ше конкретних правох и обовязкох одлучує, алє и за дружтво у цалосци.
У каждим случаю, на основи так утвердзеного стану у пракси, Защитнїк гражданох Городу Нового Саду принєсол одлуку же би ше порушало єден проєкт, чий основни циль будзе у першим крочаю упознац компетентни орґани Городу Нового Саду (городски управи, явни подприємства, орґани и ораґнизациї чий снователь Город Нови Сад и други) зоз саму институцию Защитнїка гражданох, з єй компетенциями, поступаньом и резултатами роботи, же би у своїм одношеню з гражданами могли виправиц одредзени нєправилносци и нєдостатки. Вшелїяк, основна интенция єдного такого проєкту то приблїжованє институциї Защитнїка гражданох ґу компетентним орґаном Городу Нового Саду, з єдним основним цильом, а то упознаванє тих истих институцийох зоз Защитнїком гражданох пре защиту и витворенє правох и шлєбодох гражданох Городу Нового Саду. У рамикох того проєкту, коло компетентних орґанох, орґанизацийох, службох и установох Городу Нового Саду, запровадзи ше едукацию о самей институциї и з представителями медийох, як єдним з найважнєйших сотруднїкох Защитнїка гражданох у заєднїцкей борби за защиту правох и шлєбодох гражданох од нєзаконїтого и нєправилного поступаня орґанох управи.

ПРАВНИ РАМИК ПОСТУПАНЯ ЗАЩИТНЇКА ГРАЖДАНОХ

Защитнїк гражданох установени за територию Городу Нового Саду як нєзависни и самостойни орґан, хтори щици права гражданох и контролує роботу городских управох, окремних орґанизацийох и службох Городу Нового Саду, орґана цо компетентни за правну защиту маєткових правох и интересох Городу Нового Саду, як и других орґанох и орґанизацийох, подприємствох и установох чий снователь Город Нови Сад, а хторим зверени явни овласценя. Защитнїк гражданох ше тиж стара и о защити и унапредзеню людских и меншинских правох и шлєбодох.

У окончованю своїх роботох Защитнїк гражданох нєзависни и самостойни и нїхто нє ма право уплївовац на його роботу и поступанє. Основни принципи дїйствованя Защитнїка гражданох то законїтосц, нєпристрасносц, нєзависносц и справедлївосц.
Согласно члену 25. Одлуки о Защитнїкови гражданох ("Службени новини Городу Нового Саду", число 47/2008) утвердзени компетенциї Защитнїка гражданох Городу Нового Саду. Защитнїк гражданох окончує шлїдуюци роботи: провадзи применьованє медзинародних стандардох о людских правох на териториї Городу Нового Саду; збера информациї з рижних жридлох о применьованю законох и других предписаньох, як и одлукох и других общих актох орґанох Городу з обласци людских правох з боку орґанох управи; пририхтує рочни звит о витворйованю и почитованю людских правох и применьованю начала нєдискриминациї з боку орґанох управи и доручує го Скупштини Городу; прима и випитує притужби хтори ше одноша на потупенє людских правох з боку орґанох управи; поступа на власну инициятиву у каждим случаю дзе єст подозривосц о постояню потупйованя людских правох з боку орґанох управи; поштредує у мирним ришованю спорох у вязи з потупйованьом людских правох на териториї Городу Нового Саду; орґанизує и участвує у орґанизациї и пририхтованю совитованьох о витворйованю и почитованю людских правох и забрани дискриминациї; орґанизує и участвує у орґанизациї и пририхтованьох кампаньох за информованє явносци о питаньох хтори значни за витворйованє и почитованє людских правох и забрани дискриминациї; иницирує и стимулує образованє о людских правох у шицких обласцох живота; сотрудзує и чера искуства з другима защитнїками гражданох и другима орґанами и орґанизациями хтори ше занїмаю зоз защиту и унапредзеньом людских правох у жеми и иножемстве итд.
Коло горе наведзеного, Защитнїк гражданох овласцени: поднєсц Скупштини Городу, городоначалнїкови и Городскей ради инициятиву за вименку одлукох и других общих актох, кед трима же до потупеня правох гражданох приходзи пре нєдостатки у предписаньох з компетенциї тих орґанох, як и иницировац приношенє нових одлукох и других общих актох, кед трима же то значне за витворйованє и защиту правох гражданох, з тим же компетентне цело Скупштини Городу, городоначалнїк и Городска рада обовязни розпатрац инициятиви хтори поднєше Защитнїк гражданох; порушац поступок пред Уставним судом за оцену уставносци и законїтосци одлукох и других общих актох орґанох Городу Нового Саду зоз хторима ше ушорює права и шлєбоди гражданох; явно препоручиц розришенє старшини хтори руководзи з орґаном управи хтори одвичательни за потупенє правох гражданох, односно иницировац порушованє дисциплинского поступку процив занятого у орґану управи хтори нєпоштредно одвичательни за зробене потупенє, и то кед з повтореного поступку старшини хтори руководзи з орґаном управи або занятого шлїдзи намира одбивац сотруднїцтво зоз Защитнїком гражданох або кед ше утвердзи же зоз зробеним потупеньом гражданови направена материялна або друга чкода векших розмирох; поднєсц компетентному орґану вимаганє, односно прияву за порушованє виновного, потупового або другого одвитуюцого поступку, кед найдзе же у дїйох старшини хтори руководзи з орґаном управи або занятого у орґану управи єст елементи виновного або другого караюцого дїла.
Защитнїк гражданох нє овласцени контроловац роботу Скупштини Городу, городоначалнїка и Городскей ради, як анї роботу судох и явних тужительствох хтори основани за територию Городу Нового Саду.
Поступок пред Защитнїком гражданох реґуловани з Одлуку о Защитнїкови гражданох („Службени новини Городу Нового Саду“, число 47/2008). Защитнїк гражданох порушує поступок по притужби гражданох або на власну инициятиву. Гражданє подноша притужбу у писаней форми, уключуюци шицки способи електронскей комуникациї, або усно на записнїк. Притужба муши облапяц особни податки подношителя притужби, муши буц подписана и муши мац факти и докази хтори подкрипюю наводзеня з притужби. Коло права на порушованє и водзенє поступку, Защитнїк гражданох ма право з даваньом добрих услугох, поштредованьом и даваньом совитох и думаня о питаньох зоз своєй компетенциї, дїйствовац превентивно, з цильом унапредзеня роботи орґанох управи и унапредзеня защити людских правох и шлєбодох.
Поступок пред Защитнїком гражданох безплатни, а пре єдноставнєйшу процедуру, направени формулар притужби хтори гражданє пополнюю. По потреби, заняти у Фаховей служби Защитнїка гражданох даваю помоц гражданом при пополньованю притужби.
Защитнїк гражданох нє поступа по анонимних притужбох, окрем кед оценї же у анонимней притужби єст основи за його поступанє; теди поступок поруша на власну инициятиву. Притужбу мож поднєсц на сербским язику, або на язикох националних меншинох хтори ше службено хаснує на териториї Городу Нового Саду. Поступок пред Защитнїком гражданох нє явни.
По розпатраню притужби Защитнїк гражданох овласцени поднєшену притужбу одбиц, кед вона нє виполнює шицки условия же би ше по нєй могло поступац, алє и у тим случаю Защитнїк гражданох да подношительови притужби совит о евентуално других можлївосцох за витворйованє и защиту його правох. Защитнїк гражданох нє будзе поступац у случайох кед у притужби нєт податки на основи хторих подношителя мож зоз сиґурносцу идентификовац (анонимне вимаганє); кед ше одноши на роботу Скупштини Городу, городоначалнїка и Городскей ради; кед ше одноши на роботу републичних и покраїнских орґанох; кед є поднєшена после того як прешол єден рок од дня доручованя другоступньовей одлуки у случаю на хтори ше притужба одноши; кед є поднєшена после того як прешол єден рок од дня кед потупенє зробене, кед процив акта або дїї орґана управи нє мож порушац управни поступок; кед ше роби о повтореней притужби хтора нє ма нови наводзеня и факти хтори ю подкрипюю; кед по одлуки у предмету на хтори ше притужба одноши нє принєсол одлуку другоступньови орґан, кед ше роби о предмету у хторим у цеку управни спор або други судски поступок.
Процив одлуки Защитнїка гражданох о одбиваню притужби нє мож хасновац правни средства. Защитнїк гражданох обовязни обвисциц подношителя притужби и орґан управи на хтори ше притужба одноши, як у случаю кед утвердзи же нєт основи за порушованє и водзенє поступку по притужби, так и у случаю кед одлучи порушац поступок по притужби. Кед Защитнїк гражданох одлучи порушац поступок, длужен є прибавиц становиско орґана управи на чийо ше поступки притужба одноши, з тим же орґан управи длужен обвисциц Защитнїка гражданох о своїм становиску у чаше яки му Защитнїк гражданох одредзи, а хтори нє може буц кратши як 8, анї длугши як 30 днї од дня приманя обвисценя Защитнїка гражданох о порушованю поступку.
Орґан управи може сам под час поступку одстранїц обачени нєдостатки, о чим обвисци Защитнїка гражданох, хтори потим обвисцує подношителя притужби и кед исти задовольни зоз способом на яки нєдостаток одстранєни, Защитнїк гражданох застановює поступок. У ситуацийох кед Защитнїк гражданох найдзе же було нєдостатки у роботи орґана управи, упутює препоруку орґану управи о тим же би обачени нєдостаток требало одстранїц, з тим же орґан управи длужен обвисциц Защитнїка гражданох о мирох яки поднял, односно о причинох пре хтори нє поступел по препоруки, у чаше хтори нє може буц кратши як 15, анї длугши як 30 днї.
Кед орґан управи нє поступи по препоруки, односно нє обвисци Защитнїка гражданох о мирох яки поднял, односно кед Защитнїк гражданох трима же подняти мири нє одвитуюци, обвисци о тим орґан хтори окончує надпатрунок над роботу орґана управи, Скупштину Городу, городоначалнїка и Городску раду, а може и препоручиц утвердзованє одвичательносци старшини хтори руководзи з орґаном управи.

ПРЕДМЕТ ПРОЄКТУ

Предмет наведзеного проєкту упознац шицки релевантни институциї у Городзе з положеньом, улогу, компетенциями и поступком пред Защитнїком гражданох, а окреме маюци у оглядзе факт же Защитнїк гражданох новооснована институция у Городзе.

Методолоґия семинара така же ше у першей часци учашнїкох упознава зоз саму институцию Защитнїка гражданох, а у другей часци ше учашнїкох упозна з прикладами зоз пракси, та ше през нєпоштредну комуникацию з учашнїками будзе одвитовац на питаня з теориї и пракси.
З цильом реализациї Проєкту, Защитнїк гражданох Городу Нового Саду планує у октобре 2011. року орґанизовац семинар хтори будзе тирвац штири днї.

ЦИЉ ПРОЄКТУ

Циль хтори ше жада посцигнуц з Проєктом то же би ше през упознаванє институцийох з положеньом, улогу, компетенциями и поступком пред Защитнїком гражданох Городу Нового Саду, витворело ище лєпше сотруднїцтво, лєпше розуменє и превозиходзенє проблемох у роботи, хторе допринєше унапредзеню и защити людских и меншинских правох и шлєбодох, цо основна улога и циль постояня институциї Защитнїка гражданох.

Тиж так, циль Проєкту оможлївиц занятим у Канцелариї Защитнїка гражданох, през наведзене сотруднїцтво, же би швидше и подполнєйше помогли гражданом у витворйованю їх правох, як и обезпечиц єднакосц шицких гражданох у дружтве, хтора заснована на началє панованя права.
У своєй дальшей роботи Защитнїк гражданох ше будзе намагац же би ше прейґ медийох, з реализацию и других проєктох, промововало институцию Защитнїка гражданох, же би ше и сами гражданє на тот способ подполнєйше информовали о самей институциї и дїлокругу єй роботи.

Р Е А Л И З А Ц И Я П Р О Є К Т У

Семинар „Упознайце Защитнїка гражданох“ будзе тирвац штири днї, и то 05, 06, 07. и 11. октобра 2011. року, у периодзе од 10.00 – 14.00 годзин, у просторийох Защитнїка гражданох Городу Нового Саду, у Новим Садзе, улїца Войводянских бриґадох число 17, прижемє, сала за схадзки.

Семинар ше орґанизує през шлїдуюци цалосци, и то:
- Уводне слово

др Александар Ґруїч, Защитнїк гражданох Городу Нового Саду

- Положенє, улога, компетенция и поступок пред Защитнїком гражданох Стоянка Вараїч, заменїца Защитнїка гражданох

- Приклади з пракси

мр Мария Достанич, Вивершитель за добру управу
- Дискусия
Плановане же би преподаваня з паузами тирвали штири годзини, же би преподаванє провадзела power point презентация, а же би ше после отриманого семинара учашнїки, прейґ евалуацийного лїстку, вияшнєли о успишносци истого.
З цильом реализациї Проєкту, плановане же би ше семинар орґанизовало през штири днї у октобре 2011. року ( 05, 06, 07. и 11. октобер 2011. року) спрам шлїдуюцого розпорядку:
- перши дзень - представителє городских управох, окремних орґанизацийох и службох Городу Нового Саду и орґана цо компетентни за правну защиту маєткових правох и интересох Городу Нового Саду,

- други дзень – представителє подприємствох чий снователь Город Нови Сад, а хторим зверени явни овласценя,

- треци дзень - представителє орґанох, орґанизацийох и установох чий снователь Город Нови Сад, а хторим зверени явни овласценя,

- штварти дзень - конференция за представительох медийох.

НОШИТЕЛЄ ПРОЄКТУ:
др Александар Ґруїч

Стоянка Вараїч

ГОРОД НОВИ САД

ЗАЩИТНЇК ГРАЖДАНОХ

Число: XXII-020-12/2011-121.

Датум: 08. септембер 2011. року

НОВИ САД