Июль

1/14 июля

Праведная Ангелина, деспотисса Сербская

Кондак, глас 8

Вышняго живота желающи сподобитися,/ нижнюю пищу тщательно оставила еси,/ и богатство твое расточила еси нищим,/ и Небесное богатство прияла еси,/ и по смерти нас освящавши,/ и чудеса твоя, всехвальная Ангелино, источаеши./ Темже твое успение святое почитаем, взывающе:/ радуйся, мати прехвальная.
Преподобный Иоанн Рыльский (возвращение мощей)

Тропарь, глас 4

Твоих мощей возвращением / обитель твоя обогатися, / церковь же твоя, приемши я, просветися / и, красящися, верных созывает с веселием / светоносный твой светло праздновати день, / грядите, глаголющи, / и приимите благодатей дарования.

Ин тропарь, глас 4

Тело смирив пощением, / душу же возвысив пением, / сосуд явися избран Святому Духу, / Иоанне, отче наш, / в чистоте сердца твоего, преподобне, пожив. / Тем, дерзновение имея ко Господу, / моли спастися душам нашим.

Кондак, глас 2

Твердым умом и непрестанными молитвами / борителя врага силу всегубительную до конца поборив, / достойно от Христа прославился еси, / Иоанне всеблаженне. / Тем твоих днесь мощей возвращения / светлый совершающе праздник в веселии, / согласно вопием ти: / стаду и людем твоим ты еси с Богом, отче преподобне, / похвала и утверждение.

Ин кондак, глас 6

Благодатию Божиею нас обогатил еси / и делы благими известил еси, / званием явися, Иоанне, угодник Христа Бога. / В молитвах и постех дарований Божия Духа исполнися / и бысть недугом прогонитель / и заступник душам нашим.
Преподобный Никодим Святогорец

Тропарь, глас 3

Мудрости благодатию, отче, укра­шенный, / труба богогласная показался еси Духа / и добродетелей наставник, Никодиме Богоглаголивый, / всем бо подаеши спасительная учения, / жития чистаго показуя сияние / богатством Бо­жественных твоих словес, / имиже, яко свет, мирови возсиял еси.

Ин тропарь, глас 1

Светило Афонское, и Наксии отрасль, / и Церкве всея богодухновеннаго учителя, / Никодима, вернии, да почтим, / иже, исполняяся мудрости Божественныя, / учения бо небесная и обильная изливает вопиющим: / слава прославльшему тя Христу, / слава венчавшему тя, / слава подающему тобою нам помощь.

Кондак, глас 8

Яко таинника изряднейшаго добродетельнаго жития и благочестия, / богоноснаго учителя Православия, празднует тя Церковь, / с Небес бо дарования приемый, / озаряеши Божественными твоими писании вопиющих ти: / радуйся, отче Никодиме.
2/15 июля

Положение честной ризы Пресвятой Богородицы

Тропарь, глас 8

Богородице Приснодево, человеков покрове,/ ризу и пояс пречистаго Твоего телесе/ державное граду Твоему обложение даровала еси,/ безсеменным рождеством Твоим нетленна пребывающи,/ о Тебе бо и естество обновляется и время./ Темже молим Тя мир граду Твоему даровати// и душам нашим велию милость.

Кондак, глас 4

Одеяние всем верным нетления, Богоблагодатная Чистая,/ даровала еси, священную ризу Твою,/ еюже священное тело Твое прикрывала еси,/ покрове всех человеков,/ еяже положение празднуем любовию/ и вопием со страхом Ти, Чистая:// радуйся, Дево, христиан похвало.
Святитель Иувеналий, патриарх Иерусалимский

Тропарь, глас 4

Брата Божия на престоле архиерейства преемниче,/ святаго града Иерусалима иерарше достохвальне,/ с богомудрыми отцы в Халкидоне изъяснил еси воплощение Сына Божия,/ пришедшаго мир обновити и обожити вся человеки,/ в Церкви Его с Ним сочетавшаяся,/ святителю отче Иувеналие,/ предстоя ныне во Царствии Отца светов,/ о почитающих тя любовию молися,/ да мир и милость Спасова будет с нами.
Святитель Фотий, митрополит Киевский

Тропарь, глас 4

Словес евангельских послушателю/ и Божественных учений рачителю,/ премудрый наказателю,/ всегда страху Господню поучаяйся,/ в молитвах к Богу простираяйся,/ заградителю уст кривоглаголющим слово правыя веры,/ апостолом сопричастниче,/ вере Христовой утвердителю,/ пророчески вещателю, святителю Фотие,/ моли Христа Бога/ умирити мир и спасти души наша.

Кондак, глас 8

Троице сосуд явися честный твоим житием,/ святителю Фотие, всегда зрящий Святую Троицу,/ Ейже предстоиши, молися непрестанно о всех нас.
Свт. Арсений Тверской (перенесение мощей)

Тропарь, глас 1

Божественною свыше просветився благодатию, святителю, / и многим терпением во временней жизни подвиг совершил еси. / Темже источаеши чудес благодать / иже с верою приходящим к честней раце мощей твоих, Арсение преблаженне. / Мы же вопием ти: / слава Давшему ти крепость, / слава Венчавшему тя, / слава Действующему тобою всем исцеления.

Кондак, глас 8

Яко богоявленная российская звезда, / днесь, сияя чудесы, / явился еси, святителю Арсение. / Тем непрестанно молися Христу Богу о стаде твоем / и сохраняй отечество твое, град же и люди, / иже верою почитающих честное пренесение твое / и к честным мощем твоим припадающих со страхом и любовию целующих я. / Да вси велегласно зовем ти: / радуйся, Богомудре святителю Арсение, отче наш.
3/16 июля

Святитель Филипп, митрополит Московский и всея Руси, чудотворец (перенесение мощей)

Тропарь, глас 8

Первопрестольников преемниче,/ столпе православия, истины поборниче,/ новый исповедниче, святителю Филиппе,/ положивый душу за паству твою,/ темже, яко имея дерзновение ко Христу,/ моли за Отечество наше, за град же и люди,// чтущия достойно святую память твою.

Ин тропарь, глас 3

Чудо явися, извещением и делы возсияв,/ Духа Святаго произбранием святительства паству приим,/ откровением Божиим церковь разобра/ и величайшую воздвиже,/ всечестне Филиппе, святителю великий,/ мир граду даруй нашему Москве/ и велию милость.

Ин тропарь, глас 5

Радостный возсия день светлаго торжества:/ днесь церковная расширяются недра,/ приемлюще духовных даров неоскудеемо боготворное сокровище,/ струю благодатей неисчерпаемую,/ источника чудесем обильна,/ чудотворивыя и священныя мощи твоя,/ святителю Филиппе./ Темже моли прославившаго тя Дародателя Христа Бога/ о воспевающих тя/ и кланяющихся священным мощем твоим.

Кондак, глас 8

Во успении твоем обретоша на телеси твоем сокровище некрадомое:/ два креста и тяжчайшая железа, еже есть вериги,/ постом и молитвами Богу угодил еси, святителю Филиппе,/ моли Христа Бога о всех нас.

Ин кондак, глас 3

Яко солнце, днесь от земных недр возсияша/ честныя твоя мощи, святителю./ Землю же и воздух шествием твоим осветил еси/ и всех верных чудес богознаменьми облистал еси,/ чудотворец предивен и молитвенник к Богу о мире изящен явися./ Сего ради вопием ти:/ спасай нас теплым своим предстательством,/ яко ученик Божия благодати.
Святитель Василий, епископ Рязанский

Тропарь, глас 4

Первее в Муроме святительством почтен был еси,/ из негоже неправедно изгоняемь,/ на мантию, яко на легкий корабль, возшел еси,/ на немже паче естества, яко безплотен,/ по водам шествие творя,/ промышлением Вышняго и заступлением Богоматере управляемъ/ богоспасаемого града Рязани достигл еси /и в нем, архиерейства престол восприим,/ богоданную паству рязанскую добре упасл еси,/ святителю отче наш Василие,/ моли Христа Бога спастися душам нашим.

Кондак, глас 8

Яко многосветлая звезда, от града Мурома возсиял еси,/ святителю Василие,/ по водам же дошед до града нашего Рязани,/ Церковь Божию добре упасл еси,/ просвещая люди учением и житием твоим./ Поминай и ныне чада твоя, молим тя,/ наставниче наш добрый,/ и за ны Христу Богу и Пречистей Его Матери молися,/ да благодарною душею зовем ти:/ радуйся, угодниче Христов и теплый к Богу о нас молитвенниче.
Мученик Иакинф

Кондак, глас 6

Древо жизни посреде души своея, / веру Твою, Христе, стяжавый Твой мученик, / едемскаго рая честнейший бысть, / древо прелести змиевы погубив дерзновенно духом, / венчася славою Твоею, Многомилостиве.

Ин кондак, глас 4

Камень честен показася, Иакинфе, / в Горнем оном светлем граде водрузися, / в разумнем Сионе блистая светло, / освещая вся, чтущия честное твое страдание, / моли спастися нам, твою память почитающим.
Преподобные Иоанн и Лонгин Яренгские

Тропарь общий, глас 8

Яко звезды многосветлыя, от юности возсиявше, освятили есте сердца верные пренесением честных мощей ваших, добродетельми чудес ваших, во плоти яко бо Ангели на земли, показастеся, пощением насаждени бысте, яко древо при водах воздержания, напоени струями слез ваших, и скверну омысте, сего ради явистеся приятелище Божия Духа, Иоанне и Лонгине, молите Христа Бога спастися душам нашим.
Преподобный Иоанн

Тропарь, глас 4

От земли возведый тя и вечным обителем соблюдает и по смерти невредимо тело твое, святе Иоанне, ты бо в целомудрии и чистоте жития, блаженне, пожил еси, не осквернив тело, темже со дерзновением моли Христа Бога спастися душам нашим.
Преподобный Лонгин

Тропарь, глас 1

Свыше Божественною благодатию просветився, богомудре, многим терпением во временней жизни течение совершил еси, темже и по успении источаеши чудес благодать, иже с верою приходящим к тебе, Лонгине всеблаженне. Слава Давшему ти крепость, слава Прославльшему тя в чудесе, слава Действующему тобою всем исцеление.
Кондак общий преподобным, глас 8

Явистеся светильницы всесветлии, во плоти Ангели, яко живота древо райское, пощением, и бдением, и верою возращаеми, процвели есте. Молитвами своими небесную благодать приемше, врачеве же крепцыи явльшеся, исцеляете недужные и души с верою прибегающих к раце мощей ваших, чудотворцы славнии, Иоанне и Лонгине, сего ради вси верою и любовию вопием: радуйтеся, Поморстей стране похвало и утверждение.

Преподобный Никодим Кожеезерский (Хозьюгский)

Тропарь, глас 4

Яко безплотен, отче, пожил еси на земли, смирением и в яме пребыванием с молитвами превозносящагося врага смирил еси, яко крин, воистину процвел еси, избранный кинамон (душистое коричное дерево), и высокий кипарис, и плодовитая маслина, и финикс сладкий, и кедр благоуханный, и валсам (бальзам) чистый, терние злострастия искоренил еси и жилище Всесвятаго Духа был еси, темже поминай память твою днесь празднующих, Никодиме чудотворче, да вси радостными гласы воспеваем Христа Бога нашего, Иже тебе даровавшаго исцелений благодать.

Кондак, глас 8

Укрепляемь силою Креста и благодатию, преобидев тленная и долу влекущая мудрования, отче, бесов посрамил еси, к Вышнему течение получил еси, устремился еси в Хозьюгу пустыню, Пресвятой Троице жилище был еси, Ейже предстоя, молися о нас, почитающих тя, да возопием ти: радуйся, преблаженне Никодиме, отче наш.
Преподобные Анатолий, в Ближних пещерах (XII), и другой Анатолий затворник, в Дальних пещерах (XIII), Печерские

Тропарь, глас 3

Преблаженнии и Богоноснии отцы наши, Анатолие и Анатолие Затворниче,/ яко стяжавшии дерзновение ко Господу/ равноангельным своим житием,/ егоже ради обогати Христос нетлением и чудесы мощи ваша,/ молим вас прилежно:/ испросите душам нашим очищение/ и велию и богатую милость.

Кондак, глас 4

Богатство благодати и сыноположения/ стяжавте многими подвиги и добродетельми,/ ихже ради Христос всели души ваша в Небесная селения Своя,/ даровав благодать нетления и чудес мощем вашим,/ к нимже притекающе, вопием:/ радуйтеся, Анатолие и Анатолие Затворниче,/ ликов иночествующих похвало и украшение.
Благоверные князья Василий и Константин Ярославские

Тропарь, глас 2

Ваше отечество хвалится обагрением кровей ваших, Церковь же Божия радуется, приемши телеса ваша, людие, песненный лик составльше, духовною цевницею вопиют: ликуй, Василие, радуйся, Константине, Ярославлю славо и всей России радосте.

Кондак, глас 8

Яко цвети честнии различнии, в райстей пищи процветше невещественно, отечеству своему славу велию и сродником похвалу и честь явльше, всеистиннии победницы, великий Василие и славный Константине, но убо не престайте молящеся о граде вашем и о всех рабех своих, избавити от напастей, и бед, и всяких лютых обхождений, вопиющих вам: радуйтеся, граду нашему Ярославлю великое утверждение.

Кондак на обретение мощей, глас 4

Днесь Церковь разширяет недра своя и приемлет многоцелебныя мощи ваши, добропобеднии страдальцы, Василие славне и Константине богомудре, и, яко шипок благовонный, напаяется пречудными ароматы, богатными чудодеянии от неистощимых сокровищ, от преславных мощей ваших, и радостно чад своих созывает вопити: радуйся, двоице пречудная, отечеству своему стено необоримая.
Блаженный Иоанн, Христа ради юродивый, Московский чудотворец

Тропарь, глас 8

Иже Христа ради волею оставив твое отечество, град Вологду, и вся красная мира сего возненавидев, желанием духовным вселился еси во град Ростов, яко в пустыне скитаяся в нем, гладом и жаждею и безмерною тяготою плоть твою изнуряя и работая Господеви день и нощь, в посте и молитве пребывая в притворе церковном, власи же главы твоей пеплом и смолою удручая, и, ревнуя Василию Блаженному, пришел еси в царствующий град Москву и, в целомудрии и терпении течение добре скончав, преселился еси к вечным обителем, чудес лучи испущая, преблаженне Иоанне, отче наш, моли Христа Бога спастися душам нашим.

Ин тропарь, глас 1

Любве ради Христовы/ возненавидев мира сего вся прелестныя красоты,/ в мире живый, подвизася добре, яко ангел на земли,/ вечныя ради жизни,/ и, от земных достоинств таковых душу воскресив духом,/ плоть же поработив и повинув во всем духу, Христови распяся/ и к Божественней высоте пресветло взятся благодатию,/ прииде в Небесный чертог,/ идеже ныне, Пресвятей Троице со ангелы предстоя,/ во свете неизреченный радости веселишися, преблаженне Иоанне,/ тем благодарственно вопием ти:/ слава Избравшему тя в Руси, блаженне, устава изрядна,/ слава Укрепльшему тя в народе,/ слава молитвами твоими и нас Спасающему.

Кондак, глас 8

Иже Христа ради наложивый на ся мудростию юродство, образом буйства зрим от человек, умныма же крылома горе возлетая, все тело твое веригами обязая, яко злато многоценное, соблюдеся в народе, очистив ум от страстей, веселием духовным прешел еси море мятежнаго сего жития, обрете светлость жизни вечныя, молим тя, блаженне Иоанне, молися прилежно Христу Богу нашему сохранитися нам от всякаго навета и злых обстояний видимых и невидимых враг, да зовем ти: радуйся, многострадальне, яко да молитвами твоими направляеми, предстояще присно с тобою в Троице славимому Богу, поем Ему: Аллилуиа.
4/17 июля

Благоверный князь Андрей Боголюбский

Тропарь, глас 8

Яко благоверен и праведен, за любовь Христа Бога от своих смерть приял еси, кровь свою пролияв, якоже прежде сродницы твои страстотерпцы Борис и Глеб, ихже кровем совопиет и твоя кровь, святе, к Богу, якоже Авеля и Захарии праведных, благоверный страстотерпче, великий княже Андрее, с нимиже Христа Бога моли о стране нашей, еже богоугодней быти и сыновом российским спастися.

Кондак, глас 8

В мире сем благочестно и праведно пожив, молитвою, милостынею и благостраданием Богу угодил еси, сего ради и Бог по убиении твоем прослави тя нетлением и чудесы, Егоже, святе Андрее, моли сохранити отечество твое и всех людей, благочестно тебе почитающих.
Преподобный Андрей Рублев

Тропарь, глас 3

Божественнаго света лучами облистаемый, преподобне Андрее, Христа познал еси – Божию Премудрость и Силу и иконою Святыя Троицы всему миру проповедал еси единство во Святей Троице, мы же со удивлением и радостию вопием ти: имеяй дерзновение к Пресвятей Троице, моли просветити души наша.

Кондак, глас 8

От юности к Божественней красоте устремляйся, чудный иконописец в земли Российстей был еси, и, богоносным твоим учителем поревновав, сиянием добродетелей украсился еси, преподобне Андрее, темже и явися Церкве нашея похвала и радование.
Святитель Андрей Критский

Тропарь, глас 1

Христову Церковь цевницею языка твоего, / песнословя умильно, возвеселил еси, / богословием же Препетыя Троицы / славу всем сказал еси ясно, / тем тя, яко тайноглагольника, поем, / Андрее, пастырю Критский, / и величаем память твою, / Христа славяще дивнаго во святых Своих.

Ин тропарь, глас 4

Правило веры и образ кротости, / воздержания учителя / яви тя стаду твоему, / Яже вещей Истина. / Сего ради стяжал еси смирением высокая, / нищетою богатая, / отче Андрее, / моли Христа Бога / спастися душам нашим.

Кондак, глас 2

Вострубив ясно Божественная сладкопения, / явился еси светильник мира светлейший, / светом сияя Троицы, Андрее преподобне. / Темже вси вопием ти: / не престай моляся о всех нас.
Преподобная Марфа Антиохийская

Тропарь, глас 4

Житием чистым и любовию, яже ко Пречистей Божией Матери, / стяжала еси дар чадородия преславный, / светильника миру, дивнаго Симеона, / тем тя, Марфо, / яко матерь, о чаде веселящую­ся, песньми ублажаем.

Кондак, глас 2

В молитвах Господеви предстоящи, / Пречистей Деве Богородице пение и хвалы приносящи, / Марфо честная, / породила еси священное отроча, / Симеона предивнаго, светильника всемирнаго, / с нимже моли присно о всех нас.
Преподобный Евфимий Суздальский (обретение мощей)

Тропарь, глас 3

Яко светозарная звезда, / пришел еси от востока на запад, / оставив отечество твое, Нижний Новград, / и, дошед Богоспасаемаго града Суждаля, / в нем обитель сотворил еси, / и, собрал еси монахов множества, / и, прием дар чудес от Бога, отче Евфимие, / был еси о Христе собеседник / и спостник преподобному Сергию. / С нимже у Христа Бога испроси нам здравие, и спасение, / и душам нашим велию милость.

Кондак, глас 2

Волнений множество невлажно преходя, / безплотныя враги струями слез твоих погрузил еси, / Богомудре Евфимие преподобне, / тем и чудес дар приял еси, / моли непрестанно о всех нас.
Царственные страстотерпцы

Тропарь глас 4

Днесь, благовернии людие, светло почтим/ седмерицу честную царственных страстотерпец,/ Христову едину домашнюю Церковь:/ Николая и Александру,/ Алексия, Ольгу, Татиану, Марию и Анастасию./ Тии бо, уз и страданий многоразличных не убоявшеся,/ от богоборных смерть и поругание телес прияша/ и дерзновение ко Господу в молитве улучиша./ Сего ради к ним с любовию возопиим:/ о святии страстотерпцы,/ гласу покаяния и стенанию народа нашего вонмите,/ землю Российскую в любви к Православию утвердите,/ от междоусобныя брани сохраните,/ мир мирови у Бога испросите// и душам нашим велию милость.

Ин тропарь, глас 5

Царства земнаго лишение,/ узы и страдания многоразличныя/ кротко претерпел еси,/ свидетельствовав о Христе даже до смерти от богоборцев,/ страстотерпче великий Боговенчанный царю Николае,/ сего ради мученическим венцем на небесех,/ венча тя с царицею и чады и слуги твоими Христос Бог,/ Егоже моли помиловати страну Российскую/ и спасти души наша.

Кондак, глас 8

Избраннии Царем царствующих и Господем господствующих/ от рода царей Российских,/ благовернии мученицы,/ муки душевныя и смерть телесную за Христа приимшии/ и венцы Небесными увенчавшиися,/ к вам, яко покровителем нашим милостивым,/ с любовию благодарне вопием:/ радуйтеся, царственнии страстотерпцы,// за Русь Святую пред Богом усерднии молитвенницы.

Ин кондак, глас 6

Надежда царя мученика/ с царицею и чады и слуги укрепи,/ и к Твоей любви окрыли, будущий им покой предвозвестивши,/ тех молитвами, Господи, помилуй нас.
5/18 июля

Обретение честных мощей преподобного Сергия, игумена Радонежского

Тропарь, глас 4

Днесь пресветло красуется царствующий град Москва, яко светолучными зарями, молниями чудес твоих осияемь, всю вселенную созывает похвалити тя, богомудре Сергие; пречестная же и славная обитель твоя, юже во имя Святыя Троицы многими труды твоими создал еси, и имущи в себе стада ученик твоих, веселия и радости исполняется. Мы же, празднующе преславное обретение честных мощей твоих, в земли сокровенных, яко цвет благоуханен и кадило благовонно, любезно я лобзающе, различная исцеления приемля и твоими молитвами грехов прощения сподобляемся, отче преподобне Сергие, моли Святую Троицу спасти души наша.

Кондак, глас 8

Взирающе на предлежащий честный твой гроб, в немже скрыся, яко многоценное сокровище, святое трудолюбное твое тело чистоты, мы, чада твоя суще жалостная, в удивлении един со единем вещающе, вопием: отче наш Сергие, моли Святую Троицу и нам спастися, твоим чадом.
Преподобный Афанасий Афонский

Тропарь, глас 3

Еже во плоти житию твоему / удивишася ангельстии чини: / како с телом к невидимым сплетением изшел еси, приснославне, / и уязвил еси демонския полки. / Отонудуже, Афанасие, / Христос тебе воздаде богатыми дарованьми, / сего ради, отче, моли спастися душам нашим.

Кондак, глас 8

Яко невещественных существ зрителя изрядна / и деятельна сказателя всеистинна, / взывает тя стадо твое, Богоглагольниче: / не оскудей, моля о рабех твоих, / избавитися напастей и обхождений, вопиющим ти: / радуйся, отче Афанасие.
Преподобномученица великая княгиня Елисавета

Тропарь, глас 1

Смирением достоинство княжеское сокрывши, / богомудрая Елисавето, / сугубым служением Марфы и Марии / Христа почтила еси. / Милосердием, терпением и любовию себе предочистивши, / яко жертва праведная Богу принеслася еси. / Мы же, чтуще добродетельное житие и страдания твоя, / яко истинную наставницу усердно просим тя: / святая мученице великая княгине Елисавето, / моли Христа Бога спасти и просветити души наша.

Кондак, глас 2

Величие подвига веры кто повесть: / во глубине земли, яко в раи светлости, / страстотерпица великая княгиня Елисавета / со Ангелы во псалмех и пениих радовашеся / и, убиение претерпевающи, о безбожных мучителех взываше: / Господи, прости им грех сей, / не ведят бо, что творят. / Тоя молитвами, Христе Боже, / помилуй и спаси души наша.

Ин кондак, глас 5

От славы царственныя, вземши Крест Христов, прешла еси к славе небесней, молящи врагов, и обрела еси радость вечную, святая мученице княгине Елисавето, с Варварою мученицею. Темже молим вас: молите о душах наших.
6/19 июля

Священномученик Митрофан, архиепископ Астраханский

Тропарь, глас 4

От юности твоея заповеди Господни добре сохраняя,/ Богови во всяком долготерпении благоугождал еси,/ ревнуя о благоустроении и процветении Церкве Православныя,/ да прославится Отец Небесный во чадех ея,/ и в годину лютых гонений на веру святую исповедник безстрашен явился еси,/ за Христа мученическую кончину прияв,/ и ныне предстоя Престолу Святыя Троицы/ молися, святителю отче Митрофане,/ о всех любовию чтущих святую память твою.

Кондак, глас 5

Исповедниче веры Православныя,/ благочестия ревнителю и чистоты,/ священномучениче отче Митрофане,/ пастырь добрый и трудолюбивый материю Церковию явлен был еси/ и волков, разорити ю грядущих, не убоявся,/ душу твою за чада ея положил еси, злобу диавола Христовою любовию побеждая,/ темже и нам помози, молим ти ся,/ в терпении Евангельстем стяжати души наша.
Преподобномученик Феодор (Богоявленский)

Тропарь, глас 3

Церкве Русския столпе непоколебимый / благочестия правило, / жития евангельского образе, / преподобномучениче Феодоре, / Христа ради пострадавый даже до крове, / Егоже моли усердно, / яко Начальника и Совершителя спасения, / Русь Святую утвердити в Православии // до скончания века.

Кондак, глас 3

Мирскаго мятежа удаливыйся, / добре Богу послужил еси, / во дни же гонений на Церковь Русскую / кровь Твою за Христа пролиял еси / и страданьми твоими землю нашу обагрил еси. / Темже молися преподобномучениче Феодоре, / сохранитися ей в православии и благочестии // до скончания века.
Преподобный Сисой, схимник Печерский, в Дальних пещерах почивающий

Тропарь, глас 1

Пустынный житель, и в телеси Ангел,/ и чудотворец явился еси, Богоносе отче наш Сисое,/ постом, бдением, молитвою Небесная дарования приим,/ исцеляеши недужныя и души верою притекающих ти./ Слава Давшему тебе крепость,/ слава Венчавшему тя,/ слава Действующему тобою всем исцеления.

Кондак, глас 1

Сисое чудне, на страсти вельми подвизавыйся и постом и нощными молитвами сия успивый, благодать от Христа приял еси в страстех бедствующим пособствовати. Тем и наша страсти плоти и духа исцели, молимся.

следующая страница>