Любовь ТИХОНОВА
Обломов али но улэп
Восточно-Европейской университетын Национальной библиотекаысь библиотекарьёс «Туала Гончаров» котырес ӝӧк ортчытӥзы. Отчы ӟуч литератураез гажасьёс, Удмурт кун университетысь преподавательёс, студентъёс, городысь библиотекарьёс, школаысь дышетскись нылпиос но лыдӟисьёс пыриськизы.

Туэ ӟуч классиклы Иван Гончаровлы 200 ар тырме, соин валче таиз ар Гончаровлы сӥземын. Та сярысь вераськиз дышетонъя но наукая министрлэн воштӥсез Игорь Белозеров. Со пусйиз: жаляса верано, тросэз дышетӥсьёс та писателез дышетон программаысь палэнто. Но кулэ вылэм сое лыдӟыны, внеклассной урокъёсы ке но пыртыны.

Иван Александрович 3 роман гожтыса вуттӥз: «Обломов», «Обрыв»,«Обыкновенная история». Соослы ӟеч дунъет сётӥз Удмурт куш университетысь тодосчи, литературовед Елена Подшивало ва. Со мур-мур эскеремын ӧвӧл на, пусйиз тодосчи, сое эшшо золгес омыръяны луоно на. Со борды итӥськыса, писательлэн ужъёсыз сярысь ас мылкыдъёссэс кисьтӥзы школаосысь дышетӥсьёс но дышетскисьёс.

Ижысь 30-тӥ лицейын театр-студия ужа, бадӟым классъёсын дышетскись нылпиос отчы мыло-кы – до ветло. Студиен кивалтэ Владимир Рубцов. Нылпиос Гончаровлэн «Обыкновенная история» романэзъя спектакль шудо. Сое дасямзы но шудэмзы пумысен вакчияк мадизы театрен кивалтӥсь но шудӥсь нылъёс-пиос.

– Спектакль бордын ар но ӝыны пала ужамы, – вера Владимир Рубцов. – Ужмы учкымон пӧрмиз. Лицейын дышетскисьёс но дышетӥсьёс сое шуныт пумитазы. Тау каро таӵе уж борды кутскеммылы, рецензиос гожъяло.

Ваньзы сямен мӧйыос но нылпиос пусйизы: Обломовъёс – улон шоры диван вылысен учкисъёс – али но асьме пӧлын уло, Гончаровлэн произведениосыз ноку уз вужме, калык сое яратыса лыдӟоз.

Тихонова, Любовь Ивановна. Обломов али но улэп // Удмурт дунне. 2012. 14 марта. С. 8.