https://www.inform.kz/kaz/article/2308004
2010-09-29 10:30:00.0
Қазақ агротехникалық университетінде «Алғашқы студенттік күз» дәстүрлі байқауы басталды

АСТАНА. Қыркүйектің 29-ы. ҚазАқпарат /Гүлмира Әлиакпарова/ - Астанадағы С.Сейфуллин атындағы Қазақ агротехникалық университетінің табалдырығын жуырда ғана аттаған бірінші курс студенттері «Алғашқы студенттік күз» атты дәстүрлі шығармашылық байқауда өзара сынға түсуде.

Университеттің Тәрбие жұмыстары және әлеуметтік мәселелер жөніндегі проректоры Александр Майердің айтуынша, «Алғашқы студенттік күз» байқауы университет қабырғасында 1997 жылдан бері дәстүрлі ұйымдастырылып келеді және ол оқу орнының табалдырығын алғаш аттаған студенттерге арналған бірінші іс-шара болып табылады.

«Оның басты мақсаты - 1 курс студенттерін бір-бірімен таныстыру, оларды алғашқы күндерден ұйымшылдыққа баулып, ұжымдастыру. Дәл осы байқауда талапты да талантты жастарды анықтап, бойдағы өнерлерін шыңдауға ынталандыру үшін бар мүмкіндіктерді жасайтын боламыз. Өйткені біздің университет оқу үрдісін ғана емес, сонымен қатар спорт, мәдениет, тәрбие сынды студенттік өмірдің барлық бағыттарын қамтиды»,  деді ол.

Ереже бойынша байқауға қатысушы 8 факультет - музыкалық аспаптарда ойнау, мәнерлеп өлең оқу, жеке және жұп болып ән айтып, би билеу аталымдарында сынға түсетін болады. Сондай-ақ көрермендер мен қазылар алқасына таңғалдырарлық өнерлерін көрсетіп, бүгінгі өмірдің түйіткілдеріне қатысты өткір, әрі әдемі қалжындарды ұсынуы тиіс. Әділқазылар алқасы сонымен қатар, концерттік бағдарламаның ұйымдастырылуы мен оның сапасын бағалайтын болады.

 Қыркүйектің 28-і күні басталған байқау үш күнге жалғасып, оның соңы гала-концертпен аяқталады. Жеңімпаз факультеттер ректорат атынан ақшалай сыйлыққа ие болады. Биыл ең үздік концерттік қойылым мен жеке орындаушыларға өздерінің бағалы сыйлықтарын Студенттік кәсіподақ пен «Лига Жас StaR» креатив агенттігі де тағайындап отыр.