Айқын. – 2013. - №39. – 2 наурыз

Махамбет Қ.

Мұражайға сыйға тартты

С.Сейфуллин атындағы Қазақ агротехникалық университетінің ізденушілері «ЕХРО - 2017» халықаралық мамандандырылған көрменің мұражайына алғашқы экспонатты сыйға тартты.

Студенттердің қолымен жасалған тың туынды «Қазақстанның картасы» деп аталады. Ол топырақтан жасалған. Ұзындығы —161, ені — 91, жалпы ауданы — 103 см. Бұл өлшемдер бекерден-бекер таңдалмаған. 161 көрмені өткізу туралы сайлауға қатысқан елдердің қарасын көрсетсе, 103 Қазақстанда көрмені өткізуді қолдаған мемлекеттердің санын айғақтайды. Ал 91 ел тәуелсіздігінің жария етілген күнін еске салады Жұмбақтас және Алтай таулары бейнеленген.

«Біз картада топырақтан басқа төрт тауды орналастырдық. Олар минералдық тастардан жасалды. Таулар картаның төрт бұрышына орналастырылды. Осы арқылы біз қазақтың «төртеу түгел болса, төбедегі келеді» деген даналығын паш еткіміз келді» деді журналистерге аталмыш оқу орнының 4-курс студенті, карта авторы Лала Тәңірбергенова.

«Қазақстан картасының» таныстырылымында университет ректоры Ақылбек Күрішбаев сөз сөйледі. Ол «ЕХРО — 2017» көрмесі еліміздің мәртебесін асқақтататын айтулы шара екенін атап көрсетіп: «Бұл көрмені еліміздің ішкі және сыртқы саясатының айқын жеңісі деуге болады. ЭКСПО-ға қоғам болып атсалысуымыз қажет. Халықаралық көрмеге жастар бір кісідей қатысса, нұр үстіне нұр болады. Осы орайда университетіміздің студенттерінің мемлекеттік деңгейдегі шарадан сырт қалмағандығына тоқталғым келеді. «Қазақстан картасын» жасау студентгеріміздің өз бастамасы, өз идеясы болды» деді.

Ректордың сөзінше, университет ұжымы бастамашыл жастарды қолдауға әзір. «Жанам» дейтіндер мен «болам» дейтіндерге оқу ордасы моральдық- материалдық көмекті аямайды.

Басқосу барысында А.Күрішбаев «ЕХРО - 2017» халықаралық көрмесінің маркетинг коммуникация департаментінің басшысы Әсел Қожақоваға алдағы уақытта өзара тығыз қарым-қатынас орнатуды ұсынды. Өз кезегінде де­партамент басшысы студенттерге ризашылығын білдіріп, көрменің мұражайына жасаған тартуларына алғыс айтты.

«Мен бастамашыл жастарға сүйсініп отырмын. Олар «ЕХРО - 2017» көрмесіне қолдау көрсетіп отырған алғашқы студенттер. Осы жастар халықаралық көрменің ұйымдастырылуына, өткізілуіне тікелей атсалысатын болады. Меніңше, бастамашыл жастар қазірдің өзінде жауапкершілігі мол істі атқаруға дайын» деді Ә.Қожақова.