Абрамова Алина Игоревна, учащаяся 8 класса МБОУ Новобиинская СОШ Вавожского района Удмуртской Республики

Куратор: Музиянова Людмила Арсентьевна, учитель русского языка и литературы высшей категории МБОУ Новобиинская СОШ Вавожского района Удмуртской Республики

А.В. Костюнин «Сострадание»

Жалян (перевод на удмуртский язык)

Тодад вайыто одӥг учырез, кудзэ тон пичи дыръяд ас синмыныд адӟид.

Тон эшед доры куное пырид. Гуразьпалын пуке вал солэн песянаез. Со йырсазь сураськонэн курадӟе. Висе ке но, бадӟым сюлэмо но ужез гажась адями – сыӵезэ утчаса но уд шедьты. Гурт котырын быдэ вуэм нылызлы юрттон понна, пӧртэм киуж борды кутскылӥз. Бӧрсяз посудаез выльысь миськоно ке но вал, со туж тыршиз. Нош кыӵе кибашлы носки керттыны, половик куыны! Тани али но со, гуразьпалын пукыса, яратоно нунокезлы носки керттэ. Самой дуно адямиезлы!

Солэн школаысь вуэмез – солы шыпыт, югыт шумпотон...

Песянайлэн вордӥськем кылыз – карел – пичи, бырись калыклэн кылыз. Милям туж сереммы потэ вал, куке со валантэм кылын шыпытак гинэ вӧсяськылӥз, нош ӟуч кылын визьтэм частушкаос кырӟалляз.

Эшед кепыраз песянаезлэсь.

Вожпотон люкаськиз.

Куке тӥ эшеныд, вылдӥсьтэс куштыса, вамыштӥды гуразьпалэ, со палэнтӥз киужзэ. Солэсь ымнырзэ пальпотон югдытӥз. Козлокъёс вылтӥ нунокез шоры учкизы шунытэн тырмем синъёс. Керттӥськон спицаосты кутэм ужась киосыз лябытак лэзькизы кышъям азькышет вылаз. Шӧдтэк шорысь ыжгон бугорез, улэп адями кадь, туж чаляк, сэрттӥськыса но пичияса, ляб киосысьтыз тэтчиз.

Ӝӧк вылэ зӥбиськыса, со пукон вылысь секытэн султӥз. Нош собере (кулэ ук вал озьы луыны!) бугорез доры мыкырскон сямен нунокзэ донгиз, соиз кружкае аслыз йӧл понэ вал. Йӧлыз пальккиськиз...

– Визьтэм! – урмем сямен кеськиз нунокез.

Ваньмыз туж чаляк луиз: вожпотэменыз со секыт таба кутӥз, собере, гуразьпалысь бызьыса потыкуз, ӧс куспысен кужмысьтыз лэзиз сое песянаез шоры. Таба пыктэм пыдаз шедиз. Солэн зӧк ымдуръёсыз куалектӥзы, вордӥськем кылыныз маке но вераса, висись интызэ киыныз маялляса, бӧрдыса пукон вылэ лэзькиз.

Гордэктэм бам вылтӥз синкылиос питыразы.

Астэ валатэк, изьыдэ но пальтодэ кияд кутыса, тон туж чаляк коркась бызьыса потӥд. Мугорыд буйгатӥз:

– Песянай асьмелэн ӧвӧл. Милемлы нош мар? Котьмар мед карозы…

***

Трос аръёс ортчыса, солэсь вӧсь луэмзэ тон ас вылад кадь шӧдӥд. Со дырысен та тодэ ваёнъёс – бурмисьтэм яра.

Мон, тынад Йырсазед, валаны тырши, малы дунне сокем лек шуыса. Яке со чик валантэм? Вань тунсыко лэчыт веран: «Асьмеос малпаськиськом туж лапег. Колодча пыдсын бака кадь. Со малпа, инбам колодчалэн арыкез быдӟа шуыса. Нош музъем вылэ потысал ке, со дунне шоры мукет синмын учкысал».

Адями адӟыны быгатэ сое гинэ, мае кулэ дыръяз усьтэ солы солэн Кылчинэз. Ваньмызлы – ас дыраз. Часлэсь стрелкаоссэ кадь сое уд азьланьты. Ӝог будо огшоры лулосъёс гинэ.

Соку йырам чилектӥз: Достоевскийлэн ужаз «янгыштэм пиналлэн синвуосыз» но, ӵош дышетскем эшедлэн умойтэм ужез но, – ваньмыз со юри лэсьтэмын тынэсьтыд жаляндэ сайкатон понна.

Книгаысь геройлэсь улонзэ воштыны уд быгаты ни, лултэм Мугорлэсь ужамзэ но уд берыкты. (Ортчемзэ нокин но уз быгаты берыктыны, Инмар но.) Вань на али но вуоно дыр. Ма кароно азьланяз таӵе учыръёсын?

Кин ке но выльысь но выльысь тодаз вае умойтэм ужъёссэ. Со – вылӥысь ӵектэм аспӧртэмлыко эскерон. Шонер валэктонъёс утчаку, кылдо умоесь малпанъёс но шӧдонъёс.

Тани пичи дыр ортче.

Пичи дыр – Йырсазьлэн но Луллэн уйвӧтэз.